Áhrif Lilju Mósesdóttur helgast að miklu leyti af því að hún er í andstöðu innan flokks sem er í ríkisstjórn og þar sem ríkir lítill agi.

Hún getur mótmælt stjórnarstefnunni hvað eftir annað og fengið mikla athygli í fjölmiðlum.

Ef Lija gengur úr VG er nánast öruggt að áhrif hennar minnka og sömuleiðis athyglin sem hún fær.

Þá hefði Lilja þrjá kosti vilji hún halda áfram á þingi – að sitja sem sjálfstæður þingmaður, að ganga í Hreyfingun þar sem hún finnur samhljóm eða að reyna að stofna nýjan flokk á vinstri vængnum.

Fyrsti kosturinn dæmir hana til áhrifaleysis – og athygli sem beinist að henni myndi minnka mikið.

Annar kosturinn virðist nokkuð eðlilegur, en þá yrði Lilja einfaldlega stjórnarandstöðuþingmaður.

Þriðji kosturinn er áhugaverðastur, en um leið áhættusamur. Það er óvíst hversu margir myndu vilja fylgja Lilju og stofna flokk lengst til vinstri – og hvert fylgi slíks flokks yrði.