Robert Harris er einn áhugaverðasti spennubókahöfundur samtímans – og hann hefur líka teygt sig út fyrir svið spennusagnanna. Síðustu árin hefur hann fært sig inn í hinn heillandi heim Rómverjasögunnar.

Harris sló í gegn þegar hann skrifaði bókina Fatherland, hún gerðist í Þýskalandi nasismans árið 1965 – höfundurinn gaf sér þá forsendu að Hitler hefði unnið stríðið og morðin á gyðingum hefðu verið þöguð í hel.

Hann skrifaði bók sem hét Enigma og fjallaði um fræga dulmálsvél Þjóðverja í stríðinu, Arkangelsk fjallaði um endurkomu Stalíns í Rússlandi, Ghost er bók sem byggir að nokkru leyti á Tony Blair, og svo hefur Harris skrifað tvær sögulegar skáldsögur sem fjalla um rómverska stjórnmálamanninn Cicero, þær heita Imperium og Lustrum og sú þriðja mun vera á leiðinni.

Harris er góður sögumaður, en það er ekki síst sögusviðið sem gæðir bækur hans lífi.

Ein skemmtilegasta bókin eftir hann heitir svo Pompei og lýsir lífinu við Napólíflóa dagana áður en Vesúvíus gaus árið 79 e. Kr.  Þetta er æsispennandi bók og vel undirbyggð með rannsóknum, Harris blandar saman skálduðum persónum og sögulegum; hetja bókarinnar er verkfræðingurinn Attillus sem starfar hjá vatnsveitunni en þarna er líka hinn heillandi Plíníus eldri, vísindamaður og flotaforingi. Í bakgrunni nötrar risinn ógurlegi, eldfjallið. Lýsingarnar á eldgosinu mikla og hamförunum sem lögðu Pompei í eyði eru magnaðar.

Pompei er nú að koma út á íslensku hjá bókafélaginu Uglu. Það er óhætt að mæla með henni bæði fyrir sakir skemmtunar og fróðleiks.

Þess má svo geta að Robert Harris – sem er gamall stjórnmálablaðamaður – skrifaði um íslenska hrunið í fyrra í Sunday Times. Þann pistil má lesa hérna.