Þessi skýringamynd birtist á vef DataMarket með eftirfarandi texta:

„Í Crash Course fyrirlestrum Chris Martenson er mjög áhugaverð lýsing á einkennum þess þegar verðbólur myndast á markaði. Þar er m.a. mynd sem hann sýndi þegar hann var gestur í Silfri Egils fyrir nokkrum vikum síðan sem sýnir samhengi húsnæðisverðs og launaþróunar og hvernig það samband virðist hafa rofnað í Bandaríkjunum í kringum árið 2000.

Vegna áskorana úr nokkrum áttum, ákváðum við að endurgera þessa mynd m.v. íslenskan veruleika:

Lóðrétti ásinn sýnir breytingar á þessum stærðum í prósentum frá ársbyrjun 1989.

Það er rétt að setja tvo fyrirvara við þessa mynd áður en ályktanir eru dregnar:

1. Annars vegar ræður upphafsdagsetningin nokkru um það hvernig hún lítur út, þ.e. hvenær nákvæmlega línurnar skerast. Þeir tímapunktar eru því ekkert merkilegir sem slíkir. Hending réði því að launavísitalan eins og hún er notuð í dag nær aftur til 1989 og því er það viðmiðunardagsetningin.
2. Hins vegar ná samfelldar tímaraðir yfir húsnæðisverð ekki yfir allt þetta tímabil og því þurftum við að „splæsa“ saman tveim tímaröðum til að sýna þá þróun. Frumgögnin má nálgast með því að fylgja tenglinum í lok færslunnar.

Að þessu sögðu má sjá að þessar tvær stærðir haldast nokkuð vel í hendur frá upphafi þessa tímabils þar til árið 2005 þegar húsnæðisverðið tekur kipp án þess að samsvarandi breyting verði í laununum. Fasteignaverðið er svo að nálgast fyrra jafnvægi við launin aftur, en á líklega nokkuð í land ef marka má þessa mynd og þessa aðferðafræði. Munið þó að skurðpunktar línanna segja ekki alla söguna, heldur að stærðirnar tvær séu að nálgast einhvers konar jafnvægi.

Frumgögnin á bak við þessa mynd má nálgast öll í einu lagi á vef DataMarket, og þaðan má rekja sig til upprunaheimilda með því að smella á tenglana á „Heimildir“ undir myndinni. Það vantar enn nokkuð á að notendur geti sjálfir stillt svona mynd upp að öllu leyti á vefnum hjá okkur, en þangað stefnum við vitaskuld.“