Lesandi síðunnar sendi þessa grein:

— — —

„Talsmaður lánþega: Málið er sáraeinfalt. Samningar skulu standa!“
http://eyjan.is/blog/2010/06/19/talsmadur-samtaka-lanthega-malid-er-saraeinfalt-samningar-skulu-standa/

Bæði lánveitandi og lántaki voru sammála um að af láninu skyldu greiðast vextir og verðtrygging (í formi gengistryggingar). Báðir aðilar voru í góðri trú um að skilmálinn var í samræmi við lög. Það að Hæstiréttur hefur nú sagt þetta andstætt lögum á ekki sjálfkrafa að valda öðrum aðilanum tjóni og gefa hinum hagnað.

Þá gætu lánveitendur haldið því fram að forsendur fyrir láninu væru brostnar og gjaldfellt allan höfuðstólinn einn, tveir og þrír. Það væri ekki beinlínis óskastaða fyrir bíla- eða fasteignaeigendur með gengistryggð lán að þurfa að snara út öllu því sem eftir er að greiða af höfuðstólnum. Þó svo þeir séu nú lausir undan gengislækkun krónunnar.

Eina leiðin til að greiða úr þessu fádæma rugli sem óhæft starfsfólk bankanna, óhæft FME og ennþá óhæfari Seðlabanki hafa skapað, kann að vera að beita þeirri merku réttarheimild sem kallast eðli máls. Sem væntanlega mun leiða til þeirrar niðurstöðu að lánin beri sem samsvarar íslenskum markaðsvöxtum, enda taldi Hæstiréttur þetta vera krónulán. En líklega geta hvorki þingmenn, stjórnvöld né fjármálastofnanir leyst úr þessu. Réttarágreiningurinn um hvort/hvaða vexti lánin eiga að bera hlýtur á endanum að fara fyrir dómstóla. Það eru sem sagt væntanlega ennþá margir mánuðir í það að niðurstaða fáist um stöðu þessara lána – með öðrum Hæstaréttardómi. Ballið er rétt að byrja.“