Það er merkilegt að sjá hvílíkt fylgi Besti flokkur Jóns Gnarrs fær í skoðanakönnun Fréttablaðsins.

Ef kosningarnar færu svona gæti hann ráðið því hverjir stjórnuðu Reykjavík. Það er þó ekki víst að fylgið verði svona mikið þegar nýjabrumið fer af framboðinu – nema þá að ógeð landsmanna á stjórnmálastéttinni sé þeim mun meira. Það gæti náttúrlega aukist enn við birtingu rannsóknarskýrslunnar.

Jón og félagar gætu náð að hleypa öllu sýsteminu í loft upp. Það er kannski að sumu leyti gustukaverk.

Hönnu Birnu Kristjánsdóttur hefur tekist að koma sér upp einhverri mestu teflonhúð íslenskra stjórnmálamanna. Hún gætir þess að tengja nafn sitt bara jákvæðum málum, ef eitthvað neikvætt kemur upp eru það yfirleitt aðrir en hún sem verða fyrir svörum í fjölmiðlum.  Samfylkingin er að reyna að rifja upp að Hanna Birna vann lengi á flokkskontór Sjálfstæðisflokksins með Kjartani Gunnarssyni, en það virðist ekki bíta að ráði.

Það er líka vandséð um hvað borgarstjórnarkosningar í vor eiga að snúast. Engin sjálfsögð kosningamál blasa við. Flokkarnir hafa alllir meira eða minna sömu velferðaráherslurnar núorðið, þeir eru allir samsekir um ófremdarástandið sem ríkir hér í skipulagsmálum – og sömuleiðis mestanpart um Orkuveituna líka. Hroðaleg staða hennar verður varla að kosningamáli heldur.

Þannig að líklega munu kosningarnar snúast upp í einhvers konar fegurðarsamkeppni milli Hönnu Birnu og Dags – þar sem Jón Gnarr dansar í kring í hlutverki dárans. Vinstri grænir hafa tekið áhættuna að setja Sóleyju Tómasdóttur í fyrsta sæti, konu sem vekur mjög heitar tilfinningar til og frá, og svo er eins og venjulega spurning hvort Framsókn kemur inn manni á síðustu metrunum.

Miðað við könnunina sem birtist í dag gæti verið erfitt að mynda starfhæfan meirihluta – eða varla eru líkur á að Samfylking og Sjálfstæðisflokkur vinni saman eftir kosningar eða þá Vinstri grænir og Sjálfstæðisflokkur.