Snilld er þess eðlis að hún kemur okkur sífellt á óvart. Ég horfði í gær á kvikmynd um Van Gogh – Kirk Douglas llék málarann – og einhvern veginn er maður gáttaður á óhamingju þessa óskabarns ógæfunnar – og einstakri sýn hans á heiminn sem hann miðlaði af öllum lífs- og sálarkröftum.

Rússneskur stærðfræðisnillingur leysir eina helstu stærðfræðigátu í heimi, setti lausnina á internetið árið 2002, og nú finna menn hann og bjóða honum milljón dollara í verðlaun. Hann opnar ekki dyrnar og segir að sig vanhagi ekki um neitt.

Ég verð að viðurkenna að ég skil ekki þrautina sem er kennd við Poincaré, en maðurinn sem leysti hana nefnist Grigori Perelman.

Svo er hér annar snillingur, eða gáta sem er kennd við hann. Spurt er Hver á fiskinn í gátu Einsteins? (af Vísindavef Háskólans)

Fimm hús í fimm mismunandi litum standa í röð frá vinstri til hægri. Í hverju húsi býr maður af ákveðnu þjóðerni, engir tveir af því sama. Íbúarnir fimm drekka ákveðinn drykk, reykja ákveðna vindlategund og hafa ákveðið gæludýr. Engir tveir þeirra drekka sama drykkinn, reykja sömu vindlategund eða halda sama gæludýrið. Aðrar upplýsingar:

1. Bretinn býr í rauða húsinu.
2. Svíinn hefur hunda sem gæludýr.
3. Daninn drekkur te.
4. Græna húsið er næsta hús vinstra megin við það hvíta.
5. Íbúi græna hússins drekkur kaffi.
6. Sá sem reykir Pall Mall heldur fugla.
7. Íbúi gula hússins reykir Dunhill.
8. Íbúi hússins í miðjunni drekkur mjólk.
9. Norðmaðurinn býr í fyrsta húsinu.
10. Sá sem reykir Blends býr við hliðina á þeim sem heldur ketti.
11. Sá sem á hest býr við hliðina á þeim sem reykir Dunhill.
12. Sá sem reykir Bluemasters drekkur bjór.
13. Þjóðverjinn reykir Prince.
14. Norðmaðurinn býr við hliðina á bláa húsinu.
15. Sá sem reykir Blends býr við hliðina á þeim sem drekkur vatn.