Kvikmyndaleikstjórinn Julian Temple skrifar grein um Detroit, borgina þar sem eitt sinn var blómlegur bílaiðnaður og sem var fyrrum einn ríkasti staður í Bandaríkjunum. Þar hefur húsnæðisverð lækkað um 80 prósent síðustu þrjú árin, atvinnuleysi 30 prósent, 33 prósent íbúanna eru undir fátækramörkum, í borginni ríkir lögleysa, Detroit er ein mesta glæpaborg í Bandaríkjunum – þekktar verslanakeðjur hafa lokað búðum sínum í borginni. Maður fær ekki Starbuck’s þar lengur. Samkvæmt greininni eiga íbúar víða í vandræðum með að ná sér í fersk matvæli. Fjöldi skóla hefur lokað.

Risastórar byggingar bílaverksmiðjanna gnæfa yfir borginni, þær eru að miklu leyti auðar – eitt sinn var þar dælt út bílum á færiböndum úr veksmiðjum bílarisanna – en villt náttúra er að taka yfir hluta af borginni sem var eitt sinn sú fjórða stærsta í Bandaríkjunum, hún er í reynd að minnka aftur. Að sumu leyti virkar þetta eins og einhvers konar framtíðarhrollvekja, dystópía, Temple kallar það post-ameríska borg.

Temple hefur gert heimildarmynd um Detroit sem nefnist Requiem for Detroit og verður sýnd á BBC á laugardag.