Samkvæmt núgildandi skipulagi Reykjavíkur er flugvöllurinn á útleið. Það er svosem ekki víst að það verði, en þetta segir í skipulaginu.

En að byggja „samgöngumiðstöð“ í Vatnsmýri þegar óvíst er um afdrif hans hljómar eins og einhvers konar bilun. Það er afar sérkennilegt að vinna eftir einhverju öðru en aðalskipulaginu. Því er borið við að byggingin muni nýtast í annað ef flugvöllurinn fer, en í hvað á það að vera?

Nú er búið að skera svo mikið niður í slökkviliði við völlinn að slökkviliðsmenn telja að að það sé hættulegt.

Og enn er haldið áfram að tönnlast á þessu orði, „samgöngumiðstöð“.

Í rauninni er þetta ekki annað en flugstöð. Strætisvagnar munu ekki aka þangað nema í litlum mæli, til þess er þetta alltof mikið út úr, og það er líka fráleitt að langferðabílar sem fara um Reykjavík komi þarna að.

Er virkilega ekki hægt að efna til skynsamlegri framkvæmda í kreppunni?