Tveir leiðtogar úr íslenskum samtíma vöktu athygli á ráðstefnunni um efnahagsmál í Hörpu í gær – þeir koma hvor úr sinni fylkingu.

Gylfi Arnbjörnsson, forseti ASÍ, var í umræðuhópi með Nóbelsverðlaunahafanum Paul Krugman og vakti athygli fyrir að hleypa hinum fræga hagfræðingi helst ekki að.

Gylfi hélt ógnarlanga ræðu og í umræðum á eftir setti hann líka á langar tölur meðan tíminn brann upp og fundargestir störðu í örvæntingu á klukkur sínar.  Það má þó virða honum til vorkunnar að fyrirspyrjendur úti í sal beindu spurningum sínum fremur til hans en Krugmans!

Svo var það Vilhjálmur Egilsson, framkvæmdastjóri SA – hann talaði vissulega ekki jafnlengi og Gylfi, en það vakti athygli að hann var mun jákvæðari á þróun íslensks efnahagslífs í hópi hinna lærðu hagfræðinga en þegar hann tekur þátt í umræðum á vegum atvinnurekenda.

Varð einhverjum galgopanum að orði að Vilhjálmur minnti á Yasser Arafat, leiðtoga Palestínumanna.

Arafat var oft mjög herskár þegar hann ávarpaði sitt fólk í Ramallah, en svo var það allt annar og friðsamari maður sem birtist heiminum þegar hann talaði á alþjóðavettvangi.