Hanna Birna Kristjánsdóttir er líklega í lykilstöðu til að slá Bjarna Benediktsson af sem formann Sjálfstæðisflokksins.

En það er spurning hvort hún lætur til skarar skríða. Það gæti dregið til tíðinda á landsfundinum eftir nokkrar vikur – ólíkt því sem verður á landsfundi Samfylkingarinnar um næstu helgi, flestum ber saman um að þaðan sé engra tíðinda að vænta.

Hvað varðar málefni er enginn munur á þeim. Hanna Birna hefur gefið þá yfirlýsingu að hún vilji hætta viðræðum við Evrópusambandið – Evrópusinnar í flokknum þurfa semsagt ekki að ímynda sér að hún sé hliðholl þeim, en hinir háværu andstæðingar Evrópusambandsins geta kosið hana án þess að hafa áhyggjur.

Það er spurt hvort Hanna Birna njóti nægs fylgis á landsfundinum sjálfum – á móti kemur að skoðanakannanir hafa sýnt að hún nýtur miklu meira fylgist meðal almennra kjósenda en Bjarni. Landsfundarfulltrúar vilja formann sem getur trekkt að atkvæði, alveg burtséð frá því sem þingmennirnir þeirra segja.

Hlutirnir leggjast frekar óþægilega fyrir Bjarna. Sjálfstæðisflokkurinn er að kynna efnahagstillögur sínar og Bjarni er að fara í fundaherferð um landið, en sama dag birtist frétt í DV um að hann hafi verið kallaður í yfirheyrslu sem vitni vegna Sjóvármála. Bjarni var í viðtali um efnahagsmálin á Bylgjunni í morgun, en óhjákvæmilega fóru þáttastjórnendurnir að spyrja út í fréttina um Sjóvá. Það lagðist greinilega frekar illa í Bjarna.

Hanna Birna hefur lýst sig mjög andsnúna klækjastjórnmálum, eins og það er kallað. En einhver gæti spurt hvort það sé tilviljun að þessi tvö mál eru í fréttum á sama tíma – það eru liðnir nokkrir mánuðir frá því Bjarni var yfirheyrður.

Ég ætla samt enn að halda mig við þá kenningu að Hanna Birna bjóði sig ekki fram – að tryggð hennar gagnvart stofnunum flokksins sé svo mikil. En það má vera að ég hafi alveg rangt fyrir mér.