Fyrir tveimur árum var Bjarni Benediktsson þeirrar skoðunar að Ísland ætti taka afstöðu til Evrópusambandsaðildar, en nú hefur hann skipt um skoðun.

Það er í sjálfu sér ekkert að því. Evran er í alvarlegri kreppu og horfur í Evrópusambandinu ekki sérlega góðar. Það er fráleitt að ætla að sambandið muni liðast í sundur, en hins vegar kunna að verða breytingar á því.

Með þessum orðum Bjarna verður Evrópusambandsaðildin enn fjarlægari en áður – það er ljóst að hann er ekki síst að beina orðum sínum að landsfundi Sjálfstæðisflokksins sem haldinn verður innan tíðar. Þetta gefur grænt ljós á mjög harðorðar ályktanir sem fundurinn mun örugglega samþykkja gegn ESB.

ESB-sinnar innan flokksins verða lítt áberandi á þessum fundi, enda erfitt að mæla fyrir aðild meðan ástandið á evrunni er eins og það er.

Og þetta kemur því sennilega til leiðar að Bjarni þarf ekki að hafa áhyggjur af formannssætinu. Harðir andstæðingar ESB, sem finnst hann vera óþarflega linur, munu kjósa hann.