Stjórnlagaráð hefur samþykkt frumvarp að stjórnarskrá. Nú er spurning hvað verður gert við þetta. Verður hægt að leggja frumvarpið nokkurn veginn óbreytt fyrir Alþingi – og síðan fyrir þjóðina – eða má búast við að það verði klippt og skorið?

Þarna eru ýmis atriði sem kunna að valda deilum. Það stendur til að jafna atkvæðisrétt, rétturinn til að krefjast þjóðaratkvæðagreiðsla er mjög rúmur – aðeins 10 prósent kjósenda þarf til þess – forseti má aðeins sitja þrjú kjörtímabil og þeir sem setjast í ráðherrastóla víkja úr þingsætum.

Svo er það auðlindaákvæðið – í því eru atriði sem njóta líklega stuðnings meirihluta þjóðarinnar en gætu farið ákaflega fyrir brjóstið á öðrum:

„Auðlindir í náttúru Íslands, sem ekki eru í einkaeigu, eru sameiginleg og ævarandi eign þjóðarinnar. Enginn getur fengið auðlindirnar, eða réttindi tengd þeim, til eignar eða varanlegra afnota og aldrei má selja þær eða veðsetja.

Til auðlinda í þjóðareign teljast náttúrugæði, svo sem nytjastofnar, aðrar auðlindir hafs og hafsbotns innan íslenskrar lögsögu og uppsprettur vatns- og virkjunarréttinda, jarðhita- og námaréttinda. Með lögum má kveða á um þjóðareign á auðlindum undir tiltekinni dýpt frá yfirborði jarðar.

Við nýtingu auðlindanna skal hafa sjálfbæra þróun og almannahag að leiðarljósi.

Stjórnvöld bera, ásamt þeim sem nýta auðlindirnar, ábyrgð á vernd þeirra. Stjórnvöld geta á grundvelli laga veitt leyfi til afnota eða hagnýtingar auðlinda eða annarra takmarkaðra almannagæða, gegn fullu gjaldi og til tiltekins hóflegs tíma í senn. Slík leyfi leiða aldrei til eignarréttar eða óafturkallanlegs forræðis yfir auðlindunum.“