Það er held ég nokkuð fjarri lagi að halda því fram að vinstri menn stjórni umræðunni á Íslandi.

Stærstu dagblöðin tvö lúta til dæmis ritstjórn manna úr Sjálfstæðisflokknum.

Að öðru leyti veit ég ekki til þess að stjórnendur fjölmiðla á Íslandi séu sérstaklega flokksbundnir.

Það er líka spurning hvar hægrið er í pólitíkinni? Sumir segja þessa dagana að Sigmundur Davíð Gunnlaugsson sé eindregnasti talsmaður hægristefnu á Íslandi.

Á móti hefur mér sýnist manni Styrmir Gunnarsson sé kominn býsna langt til vinstri. Hann virðist vera á nokkurn veginn sama stað í pólitík og gamli vinur hans, Ragnar Arnalds.

En er Ragnar Arnalds vinstrimaður?

Þorvaldur Gylfason er oft flokkaður með vinstri mönnum, en ég veit ekki betur en að hann sé eindreginn talsmaður frjálsrar verslunar, hafi verið einkavæðingarsinni um langt skeið og vilji leggja á skólagjöld.

Er það til hægri eða vinstri að vera á móti Evrópusambandinu? Hægrimenn eru við völd víðast hvar í Evrópu. Og landbúnaðurinn – er það til hægri eða vinstri að vilja ekki breyta því? Hvað þá með kvótakerfið – er andstaða gegn því hægra eða vinstra mál? Endurreisn bankanna? Aðkoma Alþjóða gjaldeyrissjóðsins?

Þetta er einhvern veginn allt í belg og biðu og snýst meira um persónur og gamla flokkadrætti en hugmyndir, hugsjónir, vinstri eða hægri.