Gestur í Kiljunni í kvöld verður hinn merki jarðvísindamaður Haraldur Sigurðsson. Haraldur er uppalinn í Stykkishólmi, en fór ungur maður til útlanda og hefur átt ævintýralegt lífshlaup við rannsóknir á voldugustu eldfjallasvæðum heims, í Indónesíu, hjá Vesúvíusi og við austanvert Miðjarðarhaf. Hann var prófessor við háskólann á Rhode Island í Bandaríkjunum, en sneri loks aftur í Stykkishólm þar sem hann hefur byggt upp eldfjallasafn. Haraldur hefur ritað ævisögu sína sem ber nafnið Eldur niðri.

Við Guðjón Friðriksson vitjum leiða Jökuls Jakobssonar, Ástu Sigurðardóttur og Dags Sigurðarsonar í Fossvogskirkjugarði.

Bókasafnsdagurinn verður haldinn í fyrsta skipti á morgun. Við fáum til okkar Málfríði Finnbogadóttur, verkefnisstjórna á Bókasafninu á Seltjarnarnesi, og Ingibjörgu Steinunni Sverrisdóttur landsbókavörð. Ræðum meðal annars um áhrif tölvutækninnar á bókasöfn og rifjum upp tíma lestrarfélaganna sem voru undanfari almenningsbókasafna.

Gyrðir Elíasson hefur verið mikið til umfjöllunnar í síðustu tveimur Kiljum – við látum ekki hjá líða að nefna að hann hafi fengið bókmenntaverðlaun Norðurlandaráðs.

Þorgerður E. Sigurðardóttir og Haukur Ingvarsson ræða um nýja útgáfu á Morkinskinnu, sem er komin út hjá Hinu íslenska fornritafélagi í bókaflokki sem rekur sögu sína aftur til 1928. Þau fjalla einnig um nýja skáldsögu sem nefnist Stolnar stundir og er eftir Ágúst Borgþór Sverrisson.

Bragi birtist svo í lok þáttarins eins og endranær.

Haraldur Sigurðsson eldfjallafræðingur. Það má mæla sérstaklega með bloggi hans sem fjallar um ýmislegt tengt eldfjöllum, ekki bara fræðin heldur líka list sem sýnir eldfjöll og eldsumbrot.