Eitthvað það vitlausasta sem maður hefur séð í langan tíma er að Orkuveita Reykjavíkur fái ekki lán vegna Facebókarfærslna Jóns Gnarr.

Fréttirnar af raunverulegri stöðu Orkuveitunnar hafa verið lengi á leiðinni.

Menn höfðu ávæning af þessu fyrir borgarstjórnarkosningar, en þá virtist vera samstaða meðal flokkanna um að þagga það niður.

Umræða um þetta gaus stundum upp, ég man til dæmis að Andri Geir Arinbjarnarson kom í þátt hjá mér í nóvember 2009. Þar talaði hann um vonda fjárhagsstöðu fyrirtækisins. Andri sagði að nauðsynlegt væri að gera rannsókn á fjárreiðum Orkuveitunnar.

Viðbrögðin stóðu ekki á sér. Orkuveitan mótmæli þessu harðlega – bæði ég og Andri fengum ákúrur.

Nú er þetta loks allt komið upp á yfirborðið. Það þarf að grípa til neyðaraðgerða til að bjarga þessu fyrirtæki sem eitt sinn var sagt vera stolt Reykvíkinga.

Og það er ekki vegna þess sem borgarstjórinn hefur skrifað á Facebook.