Davíð Oddsson fullyrti beinlínis í leiðara Morgunblaðsins um daginn að Icesave hafi verið Jóni Ásgeiri Jóhannessyni að kenna.

Þá fannst mörgum að það væri kannski lítið annað sem stjórnaði málflutningi Morgunblaðsins en blind heift.

Því Jón Ásgeir ber ábyrgð á mörgu misjöfnu og verður væntanlega dæmdur fyrir það, en eitt af því er ekki Icesave. Hins vegar kann að vera að hann hafi fengið lánaða einhverja peninga sem var aflað með söfnun á innlánsreikninga Icesave.

Ragnar Hall lögmaður skrifaði um þetta í grein sem birtist í fjölmiðlum.

Staðreyndin er sú að Landsbankamenn voru að því er Davíð taldi í réttu liði. Hann vildi ekki trúa neinu illu upp á þá.

Fyrirkomulagið var líka þannig að helsti ráðgjafi hans í pólitík í gegnum árin var varaformaður stjórnar bankans. Þannig var bankinn í góðu „talsambandi“ við Davíð eins og Styrmir Gunnarsson orðaði það.

Og svo til viðbótar, eins og upplýst var í dag, fékk helsti áróðursmaður (ég segi ekki hugmyndafræðingur) Davíðsflokksins sérstakar greiðslur frá Landsbankanum til að standa fyrir kynningu á skattamálum.

Það vantar svosem ekki að Hannes hefur fjallað um þau mál, hann hefur alveg unnið fyrir þessum peningum – en þeir komu frá auðmönnunum í Landsbankanum.

Þetta eru náin og innileg tengsl.