Þetta virðist vera sorglegt mál.

Ungur maður er dæmdur í sex ára fangelsi fyrir smygl á fíkniefnum.

Glæpinn framdi hann fyrir þremur árum, þá var hann 17 ára, nú er hann tvítugur. Í fréttinni segir að hann hafi verið edrú í á annað ár, sé í fastri vinnu og trúlofaður.

Hann var burðardýr, þá á kafi í neyslu fíkniefna sjálfur. Dómsuppsaga tafðist vegna anna dómsins, eins og segir.

Þarna virðist vera á ferðinni argasta refsihyggja – sem sannarlega hefur ekki gefist vel í fíkniefnamálum.

Í þessu sambandi má minna á samþykkt Alþingis frá því fyrr í þessum mánuði. Hún hjóðar svo – og er mjög athyglisverð:

  Alþingi ályktar að fela ríkisstjórninni að endurskoða stefnu í vímuefnamálum á grundvelli lausnamiðaðra og mannúðlegra úrræða, á forsendum heilbrigðiskerfisins og félagslega kerfisins, til aðstoðar og verndar neytendum efnanna og félagslegum réttindum þeirra, aðstandendum þeirra og samfélaginu í heild. 
    Heilbrigðisráðherra skipi í þessu skyni starfshóp til að vinna að mótun stefnunnar. Landlæknir, stjórn SÁÁ, ríkislögreglustjóri, framkvæmdastjóri geðsviðs Landspítalans, Rauði kross Íslands og velferðarsvið Reykjavíkurborgar tilnefni einn fulltrúa hver en þrjá fulltrúa skipi heilbrigðisráðherra án tilnefningar og verði einn þeirra formaður starfshópsins. 
    Verkefni starfshópsins verði að:
    a.     gera úttekt á gildandi lagaumhverfi svo afmarka megi viðfangsefnið nákvæmlega og undirbúa lagabreytingar og/eða nýja löggjöf, 
    b.     líta til löggjafar annarra ríkja þar sem horfið hefur verið frá refsistefnu tengdri neyslu ólöglegra vímuefna og tillagna alþjóðlegra nefnda og stofnana á sviði rannsókna í forvörnum gegn vímuefnaneyslu, 
    c.     skapa heildstæða stefnu, sem leggur höfuðáherslu á mannúðlega nálgun og vernd mannréttinda, sem dregur úr skaðlegum afleiðingum og hliðarverkunum vímuefnaneyslu og með því stuðla að auknu trausti jaðarhópa til samfélagsins og þeirra stofnana sem eiga að veita þeim þjónustu og skjól. 
    Við starfið verði leitað aðstoðar og leiðsagnar hagsmunaaðila og hjálparsamtaka, sem og innlendra og erlendra sérfræðinga eftir þörfum.

Taka má fram að þetta var samþykkt mótatkvæðalaust.