Víni skal til Haga haldið.
Herðir Bakkus ógnarvaldið.
Útúrdrukkinn eymdarlýður
eftir borgarstrætum skríður.

Nú er „brennivín í búðir“ gengið aftur á Alþingi og berst ógæfudaunninn af því um allt land.

Óumdeilt er að áfengisneysla er langmesta þjóðarböl okkar Íslendinga. Svo stiklað sé á stóru eru afleiðingar hennar mikill hluti umferðarslysa og líftjóna á þeim vígvelli, ógeðfelld drykkjulæti, fjölbreytt ofbeldi og morð, áfengissýki, heila- og lifrarskemmdir, krabbamein, nauðganir, skilnaðir, sundraðar fjölskyldur, þjáningar barna og hundruð ætlaðra fósturskaða árlega, vegna drykkju móður á meðgöngu. Tjón samfélagsins er ægilegt og mest bitnar það á fjársvelti heilbrigðiskerfisins og löggæslu á riðandi brauðfótum. Allar rannsóknir staðfesta að aukið aðgengi að þessu eiturlyfi eykur neyslu. Það er líka viðurkennt að ÁTVR hefur sinnt sínu hlutverki með sóma, hvað varðar aðgengi og vöruúrval.

Það er eitthvað mikið að heilastarfsemi þess fólks sem nægir ekki sex virkir dagar í viku til að nálgast sitt eitur.

Haldið til Haga

Það er heldur lágt risið á Alþingi nú um stundir og ekki hækkar það með þessu snargalna tilræði við öll viðurkennd lýðheilsumarkmið. Minna má á orð landlæknis og fjölmargra samtaka sem láta sér annt um heilbrigði og velferð landsmanna, nú síðast bæjarstjórn Hafnarfjarðar.

Í nýlegri skoðanakönnun um þetta efni kom fram að 61,5% svarenda voru andvíg „brennivín í búðir“ en aðeins 22,8% voru í föruneyti Bakkusar. Sorglegt er að við Vestfirðingar, ofan á allar aðrar hremmingar, þurfum að axla ábyrgð á fyrsta flutningsmanni frumvarpsins, Teiti Birni Einarssyni frá Flateyri. Enginn hér um slóðir minnist þess að í prófkjöri flokks hans eða kosningabaráttu hafi Teitur tjáð sig um það að hans helsta og fremsta hjartansmál væri, ef hann næði kjöri, að fjölga stútum undir stýri og auka á óhamingju, heilsutjón og dauðsföll í samfélagi okkar. Einhver hlýtur þó tilgangurinn að vera, meiri en frelsiskjaftæði?

Þórarinn Eldjárn hitti þar naglann snyrtilega á höfuðið, þegar hann samdi af þessu tilefni máltæki fyrir Alþingi, sem hljóðar svo: „Höldum áfengi til Haga.“

Á síðasta ári skilaði ÁTVR þremur milljörðum króna í arð til ríkisins. Þessum fjármunum vill TBE & Co. koma í vasa áfengisauðvaldsins, sem ekki hefur þó hingað til komist í fréttir fyrir að vera vanhaldið. Því til viðbótar skal losa allar hömlur á áfengisauglýsingum svo dansinn í kringum Bakkus geti aukist um allan helming. Flutningsmenn vita raunar upp á sig skömmina því eftir að hafa opnað allar brennivínsflóðgáttir vilja þeir auka fjárveitingar til forvarna.

Þetta minnir mjög á sumar dýrategundir, svo sem ketti, sem reyna, ef þeir geta, að krafsa yfir skítinn úr sér.

Alþingi til skammar

Nú er komið að Óttari Proppé heilbrigðisráðherra að fara að taka af skarið. Rolugangur hans og meðvirkni gagnvart Viðreisnar-Benedikt er að verða nokkuð auðsæ.

Proppé er úti að aka
á íhaldsins helbláa klaka.
Framtíðin björt
orðin er svört.
Flokksmenn til fótanna taka.

Öll er þessi „brennivín í búðir“-þvæla Alþingi til háborinnar skammar og því meir sem dregst að fleygja óberminu á dyr.

Að lokum gömul og raunsönn vísa, sem gæti sem best sómt sér sem leiðarstef Teits Björns & co:

Ef þú vilt að ævi þín
öll í hunda fari
á hverjum degi drekktu vín
dýrum vitlausari.

– Indriði Aðalsteinsson

Höfundur er bóndi á Skjaldfönn við Djúp. Greinin birtist fyrst í Vestfjörðum.