Sveinn Allan Morthens forstöðumaður Gistiskýlisins við Lindargötu segir nauðsynlegt að gera breytingar því endalaust sé verið að byggja brýr til að útigangsmenn geti haldið áfram neyslu sinni hér á landi. Segir Sveinn í samtali við helgarblað DV að í raun sé þetta nokkuð þægilegt líf ef það er borið saman við stöðu annarra öryrkja í samfélaginu sem enga aðstoð fái. Hann hefur talað fyrir því að utangarðsfólk greiði fyrir gistingu og mat í Gistiskýlinu, ekki háa upphæð, heldur til að fá þá sem þar búa til að finna til ábyrgðar.

Sveinn býr yfir mikilli reynslu þegar kemur að meðferðarmálum og vill hann að áhersla sé lögð á að kenna utangarðsfólki að taka ábyrgð á sjálfum sér, hjálp til sjálfshjálpar, líkt og hann orðar það. Fálega hefur verið tekið í hugmyndir Sveins hjá Reykjavíkurborg og því sé staðan sú að borgin sé að viðhalda neyslu útigangsmanna og greiði háar fjárhæðir sem fari beint í neðanjarðarhagkerfið, fé sem lendi í vösum landa- og eiturlyfjasala.

Við erum að svæfa þessa menn með góðmennsku,

segir Sveinn. Telur hann húsnæðið við Lindargötu ekki heppilegt, útigangsmenn hafi lagt undir sig Vitatorg á meðan gistiskýlið er lokað á daginn og hafa aðrir íbúar á svæðinu orðið fyrir ónæði. Einn útigangsmaður lést nálægt gistiskýlinu og annar lést á Vitatorgi af völdum áfengiskrampa. Segir Sveinn að það sé löngu ljóst að aðferðirnar sem notaðar eru í dag séu ekki að virka, engu að síður hefur Reykjavíkurborg ákveðið að halda Gistiskýlinu áfram opnu um óákveðinn tíma. Í skýrslu sem lögð var fyrir borgarráð í mars kom fram að eðlilegt sé að þeim sem nýti Gistiskýlið sem fasta búsetu verði fundið varanlegt húsnæði. Enginn tímarammi hefur verið gefinn upp og því eru engar lausnir handan við hornið í bráð.