MMR hefur birt niðurstöður könnunar um ánægju Íslendinga með störf Guðna Th. Jóhannessonar forseta. „Íslendingar eru gífurlega ánægðir með störf Guðna Th. Jóhannessonar!“ segir í fréttatilkynningu frá MMR en fólk er misjafnlega ánægt með hann eftir því hvar það stendur í pólitík. Konur eru almennt sáttari með forseta lýðveldisins en karlar og stuðningsfólk Framsóknar er óánægðast með hann.

Könnunin var gerð 11.-26. apríl og tóku 926 manns þátt í henni, 18 ára og eldri valdir af handahófi úr hópi álitsgjafa MMR.

Í heildina voru 24% svarenda frekar ánægðir með störf forsetans og 61% mjög ánægðir, samtals eru því 85% landsmanna sátt við störf hans. Alls eru 91% kvenna ánægð með störf Guðna og 80% karla.

Stuðningsfólk Pírata og Vinstri grænna er ánægðast með störf forsetans eða 95%. Samfylkingarfólk fylgir þar fast á eftir en 92% kjósenda flokksins segjast ánægð með Guðna. Af kjósendum Sjálfstæðisflokks eru 47% mjög ánægðir, 33% frekar ánægðir og 18% ekki ánægðir með núverandi íbúa Bessastaða. 67% kjósenda Framsóknarflokks eru ánægð með forsetann og 11% óánægð.

Ekki er mikill munur á afstöðu þeirra sem þátt tóku í könnuninni eftir búsetu. Af íbúum höfuðborgarsvæðisins eru 86% ánægð með Guðna og 84% þeirra sem búa á landsbyggðinni.