Björt framtíð myndi detta af þingi ef kosið yrði til Alþingis í dag og staðan væri mjög tvísýn hjá Viðreisn. Þetta kemur fram í nýrri könnun MMR yfir fylgi stjórnmálaflokka sem birt er í dag. Sjálfstæðisflokkurinn er sem fyrr stærstur flokka með 25,2% fylgi en Vinstri grænir sækja hart að þeim með 23,4% fylgi.

Ríkisstjórnarflokkarnir mælast samanlegt með 33,4% fylgi, en 31,4% aðspurðra sögðust styðja ríkisstjórnina. Björt Framtíð mælist jafn stór og Flokkur fólksins, með 3,2% fylgi og Viðreisn mælist með slétt 5% fylgi, sem dugar til að ná mönnum á þing en það munar einungis 0,1% kjósenda að flokkurinn hyrfi af þingi.

Píratar mælast með 12,8% fylgi, Framsókn með 11,1% ogSamfylkingin með 10,6%, sem er nærri helmingi meira fylgi en flokkurinn hlaut í kosingunum síðasta haust.

Könnunin var framkvæmd dagana 11. – 26. apríl 2017 og var heildarfjöldi svarenda 926 einstaklingar, 18 ára og eldri.