Sigmundur Davíð Gunnlaugsson, þingmaður Framsóknarflokksins og fyrrum formaður flokksins og forsætisráðherra var gestur í Bítinu á Bylgjunni í morgun. Þar var hann spurður út í þær sögur sem ganga að krafta hans sé óskað í borgarstjórnarflokki Framsóknar og flugvallarvina. Sigmundur segir að heilmiklar breytingar þurfi að gera í borginni en hann sé langt því frá búinn að gera allt það í landsmálunum sem hann vill gera.

Að sögn Sigmundar þykir honum vænt að heyra að fólk vilji fá hann í borgarmálin en ekki alveg jafn vænt um það að sumir vilji losna við hann úr landsmálunum. Nú standi frammi fyrir Íslandi mörg stór verkefni sem hann hafi sterkar skoðanir á og hann vilji taka þátt í.

Gulli Helga, annar þáttarstjórnenda spyr Sigmund hreint út: Þannig að þú ert ekki að fara í borgina?

Nei, ég er ekki að fara í borgina. Ég er auðvitað í Norðausturkjördæmi og margt eftir ógert þar, líka á landsvísu.

Sigmundur segir að nú standi íslensk stjórnmál frammi fyrir miklum breytingum og því fylgi tækifæri. Aðspurður um það hvað það sé í borgarmálunum sem hann telji að megi betur fara segir Sigmundur:

Ég læt það alveg vera að ræða fjármálastjórn borgarinnar og einhver slík atriði. Það blasir auðvitað við fólki að skipulag allra hluta, hvort sem það eru skipulagsmálin eða það hvernig borgin er rekin í umferðar-, samgöngumálum, í viðhaldi gatna og annarra mannvirkja, sorphirða. Allt sem almenningur lítur á sem helstu hlutverk borgaryfirvalda hefur verið í hálfgerðum ólestri.

Stjórnarandstaðan í borginni hefur tiltölulega mild við meirihlutann, nema Framsókn og flugvallarvinir sem hafa haldið uppi heilmikilli andspyrnu.

Ég heyri ekki annað en það sé mjög mikill vilji til þess að sjá verulegar breytingar í borginni á næsta kjörtímabili.