Herjólfur er nú á leið til Danmerkur í slipp og hefur Vegagerðin leigt ferjuna Baldur til að sinna siglingum til og frá Vestmannaeyjum á meðan. Til stóð að Baldur silgdi frá Vestmannaeyjum til Landeyjarhafnar í morgun kl. 08:30 en ferðin féll niður vegna veðurs.
Mikill vindur og ölduhæð er í Landeyjahöfn um þessar mundir. Baldur er ekki með leyfi til að sigla til Þorlákshafnar, að því er kemur fram á vef Samgöngustofu, og blasir því við óvissa á meðan Herjólfur er í Danmörku, en Herjólfur verður frá í rúmar þrjár vikur. Sem verra er þá liggur flug einnig niður á milli Vestmannaeyja og meginlandsins, en næsta athugun á flugskilyrðum fer fram kl.11.
