Líf Magneudóttir forseti borgarstjórnar gagnrýnir Morgunblaðið fyrir að fjalla ekkert um kvenréttindadaginn í blaði dagsins og telur að líklegast hafi blaðinu dugað að birta grein Tryggva Líndal í gær, sem bar heitið „Íslenskan og hættan frá femínismanum“.

Kvenréttindadagurinn var haldinn hátíðlegur víða um land í gær, 19.júní, afhentir voru styrkir úr jafnréttissjóði og lagði Líf blómsveig að leiði Bríetar Bjarnhéðinsdóttur í Hólakirkjugarði:

Í gær fögnuðum við kvennabaráttunni með ýmsum hætti út um alla borg og líklega um land allt. Það er hins vegar ekki stafakrókur um það í Morgunblaðinu í dag. Líklega hefur þeim fundist nóg af birta þessa súru grein hans Tryggva í gær,

segir Líf á Fésbók og vísar til greinar Tryggva V. Líndal, skálds og menningarmannfræðings, sem birtist í Morgunblaðinu í gær. Þar talaði Tryggvi um undanhald íslenskrar tungu og rakti hann ástæðuna til „femenískrar óheillaþróunar“ sem hann telur ógna tungumálinu og menningu Íslands. Líf segir fjarstæðukennt að einhver geti hugsað svona:

Ég held nú samt að langflestum hafi fundist hún kjánaleg. Það er eiginlega fjarstæðukennt að einhver geti hugsað svona í dag og ég held að þeir séu risaeðlur okkar tíma og deyja brátt út.