Lögreglan í Kaupmannahöfn hefur undanfarna daga rýmt tjaldbúðir Rómafólks í borginni en mikið hefur verið kvartað undan fólkinu. Það er sagt stunda betl víða um borg og þá hafa útigangsmenn kvartað undan ágangi Rómafólks og segja það hafa krafið þá um greiðslu, 500 danskar krónur, á nóttu fyrir að fá að sofa á ákveðnum stöðum utandyra í borginni.

Átta voru handteknir í aðgerðum lögreglunnar og kærðir fyrir brot á lögreglulögum. Einum var sleppt en danska útlendingastofnunin tók ákvörðun um að vísa hinum sjö strax úr landi. Þetta kemur fram í tilkynningu frá lögreglunni.

Frá því í byrjun apríl hefur lögreglan rýmt 23 tjalbúðir Rómafólks í dönsku höfuðborginni, 109 hafa verið kærðir og 14 vísað úr landi. Lög, sem tóku gildi 1. apríl, heimila lögreglunni að sekta fólk, sem heldur til í tjaldbúðum eins og Rómafólkið kemur sér oft upp, um 1.000 danskar krónur.

32 hafa verið sektaðir fram að þessu en þeir eru allir með rúmenskt ríkisfang að sögn Jótlandspóstsins.