Tottenham tók á móti Manchester United í stórleik ensku úrvalsdeildarinnar í gær en leiknum lauk með 2-0 sigri heimamanna.
Það var Christian Eriksen sem kom Tottenham yfir í upphafi leiks og Phil Jones skoraði svo sjálfsmark um miðjan fyrri hálfleikinn og niðurstaðan því 2-0 sigur Tottenham.
Harry Kane, framherji Tottenham segir að sigurinn hefði átt að vera mun stærri og að United hafi sloppið of auðveldlega í leiknum.
„Við spiluðum þennan leik mjög vel. Venjulega fær maður ekki svona mörg færi gegn Manchester United. Þeir eru oftast mjög þéttir varnarlega og það er erfitt að brjóta þá niður,“ sagði Kane.
„Við náðum hins vegar að skora snemma sem hjálpaði mikið og opnaði leikinn. Það eina neikvæða við þennan leik var að við skoruðum ekki fleiri mörk, þeir sluppu of auðveldlega.“
„Stundum leggjum við allt í sölurnar í leikjum okkar og það tókst í dag,“ sagði Kane að lokum.
