Bournemouth tók á móti Tottenham í ensku úrvalsdeildinni í dag en leiknum lauk með 4-1 sigri gestanna.

Það voru þeir Dele Alli, Heung-Min Son og Serge Aurier sem skoruðu mörk Tottenham í dag en Junior Stanislav skoraði mark Bournemouth í fyrri hálfleik.

Mauricio Pochettino, stjóri Tottenham var að vonum sáttur með að stigin þrjú og öruggan sigur sinna manna.

„Þetta voru viðbrögðin sem ég var að leita eftir eftir vonbrigðin gegn Juventus í vikunni. Þeir skoruðu fyrsta markið en samt sem áður fannst mér við betri í dag,“ sagði Pochettino.

„Þetta var mikil áskorun fyrir okkur, andlega eftir vonbrigðin á Wembley og við sýndum mikinn karakter í dag að koma til baka á erfiðum útivelli gegn góðu Bournemouth liði.“

„Við sýndum það í dag að allir leikmenn liðsins skipta máli og geta gert eitthvað fyrir okkur. Son hefur verið magnaður á þessari leiktíð og hann á stóran þátt í þessum sigri í dag.“

„Markmiðið okkar er skýrt, að enda eins ofarlega og við getum,“ sagði hann að lokum.