Vegna fjölda fyrirspurna hvetur Icelandair þá sem áhuga hafa á ferð á leikinn á EM 2016 gegn Englandi á mánudaginn að nýta áætlunarflug Icelandair til áfangastaða í námunda við Nice og til fjölmargra fleiri áfangastaða í Evrópu með ýmsa tengiflugsmöguleika.
Í tilkynningu frá Icelandair kemur fram að laus sæti séu til Parísar, Barcelona, Milano, Brussel, London, Amsterdam, Genfar, Kaupmannahafnar og fleiri borga nú um helgina og góðar samgöngur séu þaðan til Nice.
Allar flugvélar Icelandair eru uppteknar í reglulegu áætlunarflugi félagsins um þessar mundir og því ljóst að ekki er unnt að bjóða upp á stórfellt beint leiguflug vegna leiksins. Því hvetur Icelandair áhugafólk til þess að nýta þá möguleika sem leiðakerfið felur í sér.
Þá segir jafnframt í tilkynningunni að rétt sé að taka fram að Icelandair muni ekki hafa tök á að bjóða upp á pakkaferðir með aðgöngumiðum, gistingu o.s.f.rv. í tengslum við þennan leik. Nánari upplýsingar um áætlunarflugið eru á icelandair.is en á meðfylgjandi mynd sjást 9 af þeim áfangastöðum sem Icelandair flýgur til núna um helgina og liggja vel við samgöngum til Nice.
