Pétur Árni lét af starfi útgefanda í febrúar
Pétur Árni Jónsson, annar eigenda Mylluseturs, útgáfufélags Viðskiptablaðsins og Fiskifrétta, lét af starfi útgefanda í febrúar síðastliðnum og hefur staðan verið lögð niður. Þetta staðfestir Pétur í samtali við DV en hann hætti einnig í stjórn útgáfufélagsins. Jón Sigurðsson, framkvæmdastjóri Mylluseturs og faðir Péturs Árna, hefur tekið sæti hans í stjórn félagsins.
„Það verður enginn útgefandi heldur verður þetta eins og var áður, einungis ritstjóri á hverjum miðli,“ segir Pétur í samtali við DV en vill ekki svara því hvað taki við hjá honum.
Fram kemur í gögnum sem var skilað til Fyrirtækjaskrár Ríkisskattstjóra í febrúar að Pétur settist í stjórn einkahlutafélagsins Agros Hádegismóar 5, eða á sama tíma og það varð eign fagfjárfestingasjóðsins Gamma: Agros. Sjóðurinn er rekinn af Gamma. Pétur keypti Myllusetur haustið 2009. Einkahlutafélag í hans eigu, PÁJ Invest, á í dag 67% hlut í útgáfufélaginu. Hin 33% eru í eigu Sveins B. Jónssonar í gegnum SBJ Invest ehf.