Jamie Redknapp telur að Bukayo Saka þurfi að breyta stöðu sinni tímabundið til að finna aftur sitt besta form.

Saka hefur átt erfitt uppdráttar frá áramótum og átti dapran leik þegar Arsenal tapaði 2-0 gegn Manchester City í úrslitaleik enska deildabikarsins á Wembley. Hann var einn af nokkrum leikmönnum sem náðu ekki að standa undir væntingum í leiknum.

Redknapp segir að Arsenal þurfi meira frá sínum lykilmönnum ef liðið ætlar að berjast um Englandsmeistaratitilinn. „Þetta er tíminn þar sem stjörnurnar þurfa að stíga upp. Sá leikmaður sem mér finnst ekki vera að spila á sínu besta stigi núna er Bukayo Saka,“ sagði hann.

Hann telur að Saka þurfi að endurheimta sjálfstraust sitt og að breyting á stöðu gæti hjálpað. „Ég vil sjá meira frá honum. Hann hefur verið lykilmaður hjá Arsenal svo oft, en undanfarið hef ég ekki séð þessa sköpun, hugmyndaflug og mörk sem við þurfum frá honum,“ bætti Redknapp við.

Samkeppnin um stöður í liðinu er einnig að aukast, þar sem leikmenn á borð við Max Dowman og Noni Madueke geta einnig spilað á hægri kantinum. Að mati Redknapp þarf Saka því að finna leið til að snúa genginu við sem fyrst.