Gary Neville, goðsögn Manchester United og sparkspekingur, var látinn heyra það af Craig Burley, sérfræðingi ESPN, á samfélagsmiðlum.

Neville ræddi stöðuna hjá United í Sky Sports á mánudagskvöld, skömmu eftir að Amorim var rekinn. Þar sagði Neville að félagið yrði að snúa aftur að rótum sínum og ráða knattspyrnustjóra sem passi við DNA Manchester United.

Hann vill leggja áherslu á sóknarsinnaða knattspyrnu, að nota unga leikmenn og að félagið ætti ekki að aðlaga sig að stjóranum, heldur öfugt.

Ummælin féllu ekki í kramið hjá Craig Burley, sem birti myndband af Neville á X og skrifaði við: „Ummæla-niðurgangur, aftur!“

Athygli vekur að Amorim sjálfur nefndi Neville beint í síðustu viðtölum sínum sem stjóri United eftir jafntefli gegn Leeds. Þar gagnrýndi hann stöðuga umræðu og álag frá fjölmiðlum og sérfræðingum á borð við Neville og sagði að ef félagið réði ekki við gagnrýni frá Gary Neville þyrfti eitthvað mikið að breytast.

Þetta reyndust hans síðustu orð í starfi, en Amorim var látinn fara á mánudagsmorgun. Darren Fletcher stýrir liðinu til bráðabirgða gegn Burnley í kvöld, á meðan leit að nýjum stjóra heldur áfram.