Fyrrverandi landsliðsmaður Englands, Jonjo Shelvey, hefur af einlægni opnað sig um svefnlyfjafíkn sem hann segir hafa eyðilagt samband sitt við börnin sín.

Shelvey, sem er 33 ára, lék í ensku úrvalsdeildinni í 13 ár með Liverpool, Swansea, Newcastle og Nottingham Forest. Eftir tímann hjá Forest fór hann til Tyrklands þar sem hann lék í 18 mánuði, einn og fjarri fjölskyldu sinni. Í nýju viðtali lýsti hann því hvernig einmanaleikinn leiddi hann út í fíkn.

„Ég fór til Tyrklands í 18 mánuði og bjó einn. Þetta var það erfiðasta sem ég hef gert á ævinni. Ég varð háður svefnlyfjum. Ég kom heim af æfingu og hugsaði: Hvað á ég að gera núna?“ sagði Shelvey.

Hann sagði að hann hefði tekið þrjár eða fjórar töflur til að sofna. „Þetta varð að flótta. Ég vildi bara drepa tímann.“

Shelvey lýsti því hvernig hann vaknaði oft um miðja nótt og tók fleiri töflur áður en hann fór aftur á æfingu daginn eftir.

„Satt best að segja eyðilagði þetta sambandið mitt við börnin mín,“ sagði hann hreinskilnislega.

Með aðstoð eiginkonu sinnar Daisy tókst honum að losna úr fíkninni og hann segir lífið hafa batnað til muna síðan. Í dag leikur hann í Sameinuðu arabísku furstadæmunum og hafnar því að peningarnir hafi ráðið för.

„Það er enginn peningur hér. Þetta snýst ekki um það,“ sagði Shelvey.