Þetta fullyrt leikstjórinn Mike Binder í hlaðvarpsþættinum One Bad Movie hjá Stephen Baldwin á dögunum. Spielberg er sagður hafa orðið ósáttur við leikarann vegna uppákomu sem tengdist einu af börnum leikstjórans.
Binder sagði að málið hefði byrjað þegar kvikmyndin Man About Town var á þróunarstigi og hafði Spielberg lýst yfir áhuga á að leikstýra myndinni.
„Við verðum að gera eitthvað saman,“ átti Spielberg að hafa sagt við Binder og um leið beðið hann um að skrifa eitthvað fyrir sig. Handritið að myndinni var að hluta til innblásið af raunverulegu innbrot á heimili Spielbergs og virtist allt stefna í rétta átt þar til Ben Affleck samþykkti að leika aðalhlutverkið.
Binder segir að allt hafi bent til þess að Spielberg myndi taka myndina að sér, en allt kom fyrir ekki og var Ben Affleck ástæða þess.
„Nei. Ég get ekki unnið með honum,“ á Spielberg að hafa sagt. „Við klúðruðum nýlega mynd með honum, hann er með allt þetta J. Lo-dót í gangi núna,“ og bætti hann við að ákvörðunin byggðist einnig á persónulegum ástæðum.
Þessar persónulegu ástæður voru þær að Spielberg og Ben Affleck lentu upp á kant á þeim tíma þegar Ben Affleck og Gwyneth Paltrow, guðdóttir Spielbergs, voru saman.
Segir Binder að Spielberg hafi lýst því að barnungur sonur hans hafi strítt Affleck við sundlaugarbakkann þegar þau voru öll saman í sumarfríi. Brá sonurinn á það ráð að ýta leikaranum fullklæddum ofan í laugina.
„Ben varð mjög reiður, kom upp úr lauginni, greip í hann og kastaði honum aftur ofan í laugina og lét son minn fara að gráta,“ segir Binder að Spielberg hafi sagt. Af þessari ástæðu hefði hann engan áhuga á að vinna með honum og bað hann að finna einhvern annan.
Svo fór að lokum að Binder sjálfur leikstýrði myndinni og fór Ben Affleck með aðalhlutverkið. Myndin kom út árið 2006, fór beint á DVD og vakti litla athygli.
