Gamalt mál frá haustinu 2021 er nú á leið fyrir dóm en það varðar innrás sex manna á heimili í Holtagerði í Kópavogi og líkamsárásir þar gegn fjórum mönnum sem voru í íbúðinni.
Árásarmennirnir voru á aldrinum 16 til 19 ára og meðal þeirra elstu í hópnum var Gabríel Douane Boama, sem oft hefur verið fjallað um í fréttum DV. Hann vakti þjóðarathygli árið 2022 er hann strauk úr haldi lögreglu í Héraðsdómi Reykjavíkur, þar sem mál hans var til meðferðar. Var hann handtekinn nokkrum dögum síðar. Gabríel á langan brotaferil að baki þrátt fyrir ungan aldur og var meðal annars viðriðinn blóðug átök í Borgarholtsskóla í janúar árið 2021. Gabríel afplánar núna refsingu fyrir ýmis brot og eru einhver þeirra framin innan fangelsismúranna. Hann hefur reynt að koma lífi sínu á rétta braut eins og hann greindi frá í viðtali við DV sumarið 2024:
Mennirnir fjórir sem urðu fyrir innrásinni voru á svipuðum aldri og árásarmennirnir. Árásarmennirnir sex eru ákærðir fyrir sérstaklega hættulega líkamsárás, húsbrot og eignaspjöll en innrásin átti sér stað aðfaranótt laugardagsins 18. september árið 2021. Brutu þeir gler í útidyrahurð og skemmdu innihurð.
Brotaþolarnir hlutu allir áverka í árásinni, þar á meðal hlaut einn skurðsár á höfði sem þurfti að sauma með sjö sporum. Hann er sá eini sem gerir skaðabótakröfu í málinu og krefst hann bóta að andvirði tæplega 2,2 milljóna króna.
Málið verður þingfest við Héraðsdóm Reykjavíkur á fimmtudag, þann 27. nóvember.
