Helgi Áss Grétarsson, lögfræðingur og varaborgarfulltrúi Sjálfstæðisflokksins, segir tvær líkamsárásir sem nýlega áttu sér stað í strætókiptistöðinni í Mjódd, staðfesta enn og aftur að yfirvöld skeyta litlu sem engu um öryggismál þar.
„Sú vanræksla, og það sinnuleysi, er siðlaust,“ segir Helgi í grein sinni.
Rekur hann næst atvikin. Fyrri líkamsárásin átti sér stað 3. nóvember og hefur hún verið kærð til lögreglu. Í lok október segir Helgi hóp ungmenna hafa skemmt og tæmt sjálfsafgreiðsluvél með pokemónspilum á skiptistöðinni.
Viku seinna var eigandi sjálfsafgreiðsluvélarinnar staddur þar ásamt eiginkonu sinni og tveimur ungum börnum sínum. Eftir ábendingu nálgaðist eigandinn nokkur ungmenni sem voru stödd þar og voru hluti af hópnum sem eyðilagði sjálfsafgreiðsluvélina. Eftir orðaskipti við ungmennin hélt eigandinn för sinni áfram en „þegar komið var aðeins út fyrir þann inngang skiptistöðvarinnar, sem er nær göngugötunni í Mjódd, nálguðust ungmennin hann, samtals um fimm einstaklingar, og einn þeirra gaf eigandanum kjaftshögg í andlitið.
Við það hefst atburðarrás þar sem eiginkonan, ásamt börnunum, flýja í bíl þeirra hjóna en á meðan fjölgaði í hópi ungmennanna og barsmíðar hófust á eigandanum, sem lá á grúfu á jörðinni á meðan ítrekað var sparkað í hann. Að lokum tókst eiganda sjálfsalans, við illan leik, að komast undan.“
Seinni líkamsárásin átti sér stað 13. nóvember og hefur einnig verið kærð til lögreglu. Við lokun söluturnarins gerði afgreiðslukonan athugasemdir við ungan mann með hvaða hætti hann var að haga sér í skiptistöðinni. „Skipti engum togum, drengurinn, sem ku vera 14 ára, reif belti af sér og notaði sylgju beltisins til að ráðast á hana með þeim afleiðingum að hún slasaðist á hendi og þurfti að njóta aðhlynningar bráðamóttöku.“
Helgi segir ekki framhjá því litið að það er sorgleg staða að áðurnefnd ungmenni eru ítekað að gerast sek um afbrigðilega og refsiverða háttsemi.
„Af einhverjum ástæðum lítur út fyrir að lítið sé gert til að stemma stigu við hegðun þeirra. Það sinnuleysi er hryggilegt. Til lengri tíma tekst vonandi að þróa leiðir til að hjálpa þeim að snúa við blaðinu.“
Helgi segir þó að aðalatriðið sé einfalt og það snúi að yfirvöldum borgarinnar.
„Það er til skammar og ömurlegt með hvaða hætti borgaryfirvöld hafa látið undir höfuð leggjast að tryggja öryggi þeirra sem ganga um stærstu skiptistöð landsins, Mjóddina.
Sú krafa er sanngjörn að öryggisgæsla skiptistöðvarinnar verði færð í viðunandi horf, svo sem að á skiptistöðinni starfi öryggisvörður. Slík sýnileg öryggisgæsla hefur fælingarmátt.
Mál er að linni. Hið siðlausa sinnuleysi þarf að taka enda.“
