Arsenal hefur verðlaunað markvörðinn David Raya með betri samningi, sem undirstrikar mikilvægi hans hjá félaginu undir stjórn Mikel Arteta.

Spænski landsliðsmarkvörðurinn hefur samið um launahækkun, en samningurinn gildir áfram til ársins 2028 með möguleika á framlengingu.

Nýr samningur var gerður í sumar, þó hann hafi ekki enn verið opinberaður af félaginu. Lengd samningsins helst sem fyrr segir óbreytt, en laun Raya – sem áður voru um 100 þúsund pund á viku, hafa hækkað verulega.

Raya gekk fyrst til liðs við Arsenal frá Brentford á láni sumarið 2023 og urðu félagaskiptin varanleg ári síðar. Hann hefur síðan orðið einn af fremstu markvörðum ensku úrvalsdeildarinnar og vann Gullhanskann bæði 2023/24 og 2024/25.

Arsenal vinnur einnig að nýjum samningum við fleiri lykilmenn. Félagið hefur þegar opnað viðræður við Jurrien Timber og vonast til að ná samkomulagi við Bukayo Saka á næstunni.

William Saliba skrifaði nýlega undir fimm ára samning, á meðan Gabriel framlengdi við Arsenal til ársins 2029 í júní.