Alríkisdómari í Bandaríkjunum hefur vísað frá máli sem Spencer Elden höfðaði gegn hljómsveitinni Nirvana og tengdum aðilum. Málið varðar frægt plötuumslag sveitarinnar af plötunni Nevermind frá árinu 1991 sem sýnir Spencer nakinn.

Málið hefur velkst um bandarískt réttarkerfi í nokkur ár, en Spencer vildi meina að flokka mætti plötuumslagið sem barnaníðsefni. Framsetningin hefði verið „klámfengin“ og augljóst brot á alríkislögum.

Spencer, sem er 34 ára, var aðeins fjögurra mánaða þegar myndin var tekin og reyndi hann að færa rök fyrir því að hann hefði orðið fyrir ómældum skaða vegna plötuumslagsins.

Í frétt Billboard kemur fram að alríkisdómarinn Fernando M. Olguin hafi hafnað þeim rökum að um barnaníðsefni væri að ræða. Sagði hann að hvorki stellingin, umhverfið né heildarsamhengið á plötuumslaginu væri kynferðislegs eðlis.

Dómarinn sagði enn fremur að Elden hefði í gegnum tíðina sjálfur gert sér far um að rækta ímynd sína sem einhvers konar „mini-rokkgoðsögn.“

Þannig hefði hann meðal annars endurskapað myndina á fullorðinsárum sínum, skrifað á minjagripi og kallað sig „Nirvana-barn.“ Sagði dómarinn að í því ljósi væri erfitt að fallast á rök hans um að hann hefði orðið fyrir ævilöngum skaða.