Samúel Samúelsson, formaður meistaraflokksráðs karla hjá Vestra, hefur útskýrt hvers vegna Davíð Smári Lamude var látinn fara úr starfi þjálfara fyrr í vikunni.

Vestri hefur verið í frjálsu falli frá því liðið varð bikarmeistari fyrir rúmum mánuði og var því ákveðið að skipta um þjálfara. Jón Þór Hauksson mun stýra síðustu þremur leikjum liðsins í hörkufallbaráttu í Bestu deildinni.

„Ég held að allir þeir sem hafa horft á Vestraliðið í síðustu leikjum hafi skynjað það sama og við, mikið andleysi og úrræðaleysi og liðið ekki að sýna það sem einkenndi það Vestra lið sem við þekkjum. Okkur fannst hlutirnir frekar á leið niður á við en til batnaðar. Síðasti sigur í deildinni kom 10. ágúst, tvö stór töp gegn ÍA og ÍBV á heimavelli sem var erfitt að horfa framhjá. Það hefði verið mjög auðvelt að halla sér aftur og bíða og vona, en það var okkar mat að við yrðum að reyna að gera eitthvað til að snúa þessu við,“ segir Samúel við Fótbolta.net.

„Við (stjórnin) vorum sammála um það að það þyrfti að gera breytingar á þessum erfiða tímapunkti, annars hefði þetta ekki orðið niðurstaðan. Það var mjög erfið ákvörðun að láta hann fara, enda hefur hann gert frábærlega fyrir Vestra frá því að hann tók við félaginu fyrir þremur árum síðan og hans verður ávallt minnst fyrir þau verk. Hann gerði liðið að bikarmeisturum og kom því í Evrópukeppni. Davíð er góður og duglegur maður og frábær þjálfari sem gerði ákvörðun okkar enn erfiðari. Ákvörðun sem þessi er tekin með góðri trú og hagsmuni Vestra að leiðarljósi.“

Davíð hafnaði samningsboði frá Vestra í kringum bikarúrslitaleikinn. „Við buðum honum sama samning og hann hefur verið á, sem hann hafnaði. Við gerðum ráð fyrir gagntilboði sem kom ekki. Þannig að það var klárlega ekki nóg,“ sagði Samúel einnig, en viðtalið í heild er hér.