Sigurður Björgvin, höfundur bókarinnar Leitin að Geirfinni, segir að Keflavíkurlögreglan hafi á sínum tíma reynt að búa til fjarvistarsönnun fyrir ástmann eiginkonu Geirfinns Einarssonar, sem hvarf frá Keflavík þann 19. nóvember árið 1974.
Sigurður leiðir líkur að því í bók sinni að rannsókn Keflavíkurlögreglunnar á hvarfi Geirfinns beri merki yfirhylmingar og systir hans, Soffía Sigurðardóttir, sem kom að gerð bókarinnar, steig enn fastar niður fæti hvað þetta varðar í grein á Vísir.is þar sem hún sakar Valtý Sigurðsson, þáverandi fulltrúa bæjarfógeta í Keflavík, um að hafa tekið yfir og afvegaleitt rannsóknina á hvarfi Geirfinns.
Opinbera skýringin á hvarfi Geirfinns, samkvæmt niðurstöðum lögreglurannsóknarinnar, var sú að Geirfinnur hefði horfið eftir að hafa farið til fundar við ókunna menn í Hafnarbúðinni í Keflavík. Þau systkini hafa hins vegar komist að þeirri niðurstöðu að Geirfinnur hafi látist eftir átök á og við heimili sitt kvöldið örlagaríka.
Haukur Guðmundsson, fyrrverandi rannsóknarlögreglumaður, sem vann að rannsókn málsins í Keflavík, andmælti harkalega skrifum Soffíu í viðtali við DV um helgina og telur niðurstöður systkinanna langsóttar. Mælir hann með því að Valtý Sigurðsson höfði meiðyrðamál vegna skrifanna.
Sigurður Björgvin segir í Facebook-færslu að Sævar Ciesielski, sem sakfelldur var fyrir morð á Geirfinni en síðan sýknaður við endurupptöku málsins, hafi komist að sömu niðurstöðu og hann um hver banamaður Geirfinns væri. Sigurður skrifar:
„Ég komst að þeirri niðurstöðu eftir nokkurra ára rannsóknir að ákveðinn einstaklingur væri banamaður Geirfinns. Þá hafði ég ekki heyrt að því hefði verið haldið fram áður. Þegar ég talaði svo árið 2023 við fjölmarga fyrrverandi nágranna Geirfinns, og aðra Keflvíkinga, sagðist einn þeirra hafa séð sama mann slá Geirfinn í höfuðið þangað til Geirfinnur þagnaði. Þetta sagði hann áður en ég nefndi nein nöfn við hann.
Nú í sumar komst ég svo að því að Sævar Ciesielski hafði sama einstakling grunaðan þegar Sævar barðist fyrir endurupptöku málsins á tíunda áratugnum. Nú í sumar fékk ég í hendur greinargerð Sævars Ciesielski frá 1993 þar sem hann ásakar sama mann um að hafa banað Geirfinni. Þetta hafði ég ekki heyrt um áður.
Mér tókst einnig nú í sumar að finna flestar skýrslur sem lögreglan lét hverfa úr málsgögnunum frá Keflavík, bók XI. Þar eru tvær vitnaskýrslur teknar strax í nóv. 1974 sem benda til þess að Valtý og Hauki hafi borist ábending á sama mann (bls. 3003-3006). Þetta vissi ég ekki af heldur, ekki fyrr en nú.
Síður 3009-3010 innihalda tilraun Keflavíkurlögreglunnar til að búa til fjarvistarsönnun fyrir Svanberg, ástmann Guðnýjar konu Geirfinns. En hann var einnig staddur á Brekkubrautinni þegar Geirfinni var ráðinn bani. Á myndinni er skema sem sýnir hvaða skýrslur voru látnar hverfa. Flestar þeirra eru nú komnar í leitirnar.“
Sigurður segir í samtali við DV að skýrslurnar týndu sem hann endurheimti hafi verið í höndum aðila sem hafi ekki viljað kannast við gögnin:
„Þessar vitnaskýrslur frá Keflavík og mörg önnur málsgögn sem hurfu hafa verið í höndum ýmissra aðila innan lögreglu og dómskerfis öll þessi ár samkvæmt yfirliti sem ég fann yfir „uppruna“ þeirra. Það sem er sláandi er að enginn af þessum aðilum hefur viljað kannast við þessi gögn þegar bæði lögmenn málsaðila, settur saksóknari og fleiri hafa gert fyrirspurnir um þau síðustu áratugi.“
