Markvörðurinn Stefán Þór Ágústsson hefur skrifað undir nýjan þriggja ára samning við Val.

Stefán kom til Vals frá Selfossi snemma á síðasta ári og hefur nokkrum sinnum þurft að verja mark liðsins í sumar með góðum árangri.

Tilkynning Vals
Markvörðurinn Stefán Þór Ágústsson framlengdi í dag samningi sínum við okkur í Val til næstu þriggja ára.

Stefán sem er 24 ára gamall gekk til liðs við Val fyrir síðasta tímabil frá uppeldisfélagi sínu Selfoss. Óhætt er að segja að Stefán hafi staðið sig afskaplega vel síðan hann gekk til liðs við okkur en hann hefur m.a. leikið 8 leiki í Bestu Deildinni í sumar og 1 í Mjólkurbikarnum auk þess sem hann lék nokkrar mínútur í Evrópukeppninni.

„Það er frábært að framlengja við Stefán sem hefur vaxið og þroskast mikið hjá okkur í Val. Þrátt fyrir ungan aldur er hann með mikla reynslu og verður bara betri. Stefán er líka bara frábær drengur og liðsmaður. Það er mikill fengur fyrir okkur í Val að hafa Stefán hjá okkur næstu árin,“ segir Breki Logason formaður meistaraflokksráðs Vals.