Á miðvikudag í síðustu viku var „Rassaþefarinn“ handtekinn enn á ný fyrir að þefa af afturenda konu á almannafæri. Hann var látinn laus úr varðhaldi nokkrum dögum áður en þá sat hann inni fyrir samskonar hegðun.

Maðurinn heitir Calese Carron Crowder og er 38 ára Kaliforníubúi. Hann er á skrá yfir kynferðisbrotamenn.

KTLA segir að hann hafi verið handtekinn á miðvikudaginn fyrir enn eitt rassaþefið á almannafæri. Hann var færður í fangelsi í Los Angeles á fimmtudaginn.

Hann var látinn laus úr fangelsi 9. ágúst eftir að hafa verið í varðhaldi síðan 22. júlí síðastliðinn þegar hann var handtekinn fyrir að þefa af rassi konu í Empire Center í Burbank. Þá er hann sagður hafa þrýst andliti sínu inn í rass konu áður en hann lagði á flótta. Lögreglumenn höfðu uppi á honum síðar um kvöldið þegar hann var aftur kominn með nefið upp að rassi konu.

Hann var þá á reynslulausn eftir að hafa hlotið dóm 2021 fyrir svipað afbrot.