„Ef þú þríf­ur þig ekki þá ertu að bera bakt­erí­ur út í sund­laug­ina,“ seg­ir Sigrún Guðmundsdóttir, framkvæmdastjóri Heilbrigðiseftirlits Suðurlands, í samtali við Morgunblaðið í dag.

Í frétt blaðsins er fjallað um slæmar niðurstöður sem fengust úr eftirliti og sýnatökum í sundlaugum á Suðurlandi. Fram kemur að þegar hafi tveimur köldum pottum verið lokað, annars vegar á Hvolsvelli og hins vegar í Hveragerði. Ekki sé bara um kalda potta að ræða því einnig séu dæmi um slæmar niðurstöður þegar kemur að sundlaugum.

Sigrún segir þörf á vitundarvakningu og að ekki sé bara hægt að kenna útlendingum um. Íslendingar beri líka ábyrgð. „Ein­hverj­ir eru jafn­vel ný­komn­ir úr rækt­inni og fara bara beint ofan í sund­laug­ina. Það er ekki sniðugt. Ef þú þríf­ur þig ekki þá ertu að bera bakt­erí­ur út í sund­laug­ina,“ seg­ir hún.

Varðandi köldu pottana segir Sigrún að yfirleitt sé ekki settur klór í þá. „Um leið og ein­hver kem­ur í pott­inn, sem hef­ur ekki þrifið sig al­menni­lega, þá er hann bú­inn að menga hann,“ segir hún.

Í frétt Morgunblaðsins kemur fram að Heilbrigðiseftirlitið ætli að gefa út grein þar sem fjallað verður um mikilvægi klórs og sótthreinsiefnis í baðvatni. Þá verði landsmenn hvattir til að þrífa sig vel áður en farið er ofan í laugarnar.