Það vakti nokkra athygli í fyrradag þegar tilkynnt var að Ágúst Ólafur Ágústsson, fyrrverandi þingmaður Samfylkingar og fyrrverandi varaformaður flokksins, hefði verið ráðinn aðstoðarmaður Guðmundar Inga Kristinssonar, mennta- og barnamálaráðherra.

DV fjallaði til dæmis í gær um skrif sem birtust í staksteinum Morgunblaðsins þar sem Guðmundur Ingi fékk kaldar kveðjur. Sagði höfundur það „algjöra nýlundu“ að stjórnarflokkur skipi ráðherra annars flokks pólitískan gæslumann.

Sjá einnig: Segir að Ágúst Ólafur verði yfirfrakki Samfylkingar á ráðherra Flokks fólksins – „Algjör nýlunda“

„Öllum er ljóst að Ágúst Ólaf­ur, fv. vara­formaður Sam­fylk­ing­ar, er yf­ir­frakki Sam­fylk­ing­ar á ráðherra Flokks fólks­ins, sem hvorki virðist valda né hafa áhuga á viðkvæm­um mála­flokki grunn­skóla,“ sagði meðal annars.

Guðmundur Ingi er í viðtali í Morgunblaðinu í dag þar sem hann útskýrir ráðninguna og segir ekkert óeðlilegt við hana. Þannig hafi þeir Ágúst Ólafur unnið vel saman þegar Guðmundur Ingi kom inn á þing á sínum tíma.

„Við studd­um hvor ann­an vel á þeim tíma, ég til dæm­is studdi hann ein­dregið í mál­efn­um fatlaðs fólks og fleiri mál­um í sam­bandi við börn. Við bara náðum vel sam­an og ég þekki hann líka frá fyrri tíð,“ segir hann meðal annars við Morgunblaðið.

Hann gefur lítið fyrir þær vangaveltur sem birtust í staksteinum Morgunblaðsins í gær.

„Nei, ég er að fá öfl­ug­an mann inn í öfl­ug­an hóp sem fyr­ir er, til þess að taka á mennta­mál­un­um – og ekki veit­ir af,“ seg­ir hann meðal annars við Morgunblaðið þar sem nánar er fjallað um málið.