Bandaríska félagið Brooklyn FC, sem keppir í nýstofnaðri USL-deildinni, hefur staðfest komu króatíska framherjans Ana Maríu Marković.

25 ára Marković, sem fjölmiðlar og aðdáendur hafa kallað fegurstu knattspyrnukonu heims, hefur samið við félagið ásamt systur sinni, Kiki Marković, rétt fyrir upphaf tímabilsins í efstu deild kvenna í Bandaríkjunum.

„Að ganga til liðs við Brooklyn FC er spennandi skref fyrir mig,“ sagði Marković eftir að hafa skrifað undir.

„Ég hef spilað á mögnuðum stöðum, en ég finn strax orkuna í kringum þetta félag og borgina.“

Marković hefur leikið 25 landsleiki fyrir Króatíu og var nýverið í byrjunarliðinu í 2-1 tapi gegn Albaníu í Þjóðadeild kvenna. Hún hefur skorað tvö mörk fyrir land og þjóð, það síðasta gegn Kosovo í júní 2024.

Marković hefur einnig verið virk í umræðum um jafnrétti innan íþróttarinnar og gagnrýnt það sem konur verða fyrir, sérstaklega á samfélagsmiðlum.

Í viðtali við svissneska dagblaðið 20 Minuten árið 2022 sagði hún að knattspyrnukonur verði miklu oftar fyrir kynferðislegum athugasemdum og fordómum en karlmenn.

„Ef ég birti mynd í sundbol á samfélagsmiðlum fær það mjög ólíkar viðtökur miðað við ef Erling Haaland birtir mynd af sér í sundbuxum,“ sagði hún.

„Hann fær líklega ekki sömu kynferðislegu athugasemdirnar.“

„Við konur stöndum saman, en það sem ég óska mér er að fleiri karlmenn standi með okkur líka. Þeir tala oft um að vera ‘heiðursmenn’, það væri virkilega heiðarlegt ef þeir styddu okkur í þessum aðstæðum.“

Marković hefur ítrekað að markmið hennar sé ekki aðeins að ná árangri á vellinum heldur einnig að vera fyrirmynd fyrir ungar knattspyrnukonur og berjast fyrir jafnrétti. Hún hefur opinberlega fordæmt kynferðislegar athugasemdir og andmælt því að hún sé sett í einhvern flokk.