Rannsókn lögreglu á meintum brotum þriggja aðila vegna netsölu áfengis hefur staðið yfir í fimm ár en í prentútgáfu Viðskiptablaðsins segir að von sá á ákærum í málinu.
Arnar Sigurðsson, eigandi áfengisnetverslunarinnar Santos, staðfestir í samtali við RÚV að ákæra sé yfirvofandi. Hann segir við RÚV að félaginu hafi ekki verið birt ákæra en lögreglumaður hafi tilkynnt honum að það standi til.
Ekki liggur fyrir hvort netverslunin sjálf verður ákærð, en hún er skráð í Frakklandi, eða íslenska félagið sem afhendir áfengið.
Hagkaup hóf áfengisnetsölu í fyrra en framkvæmdastjóri Hagkaups, Sigurður Reynaldsson, segir í samtali við Viðskiptablaðið að lögregla hafi ekki rætt við Hagkaup um málið. Rekstur netverslunar Hagkaups með áfengi er í Hollandi. Sigurður lýsir yfir furðu sinni á fyrirætlunum um aðgerðir gegn þessari starfsemi:
„Staðreyndin er sú að þetta eru gömul lög sem byggja á gömlum grunni en heimurinn er búinn að breytast mjög mikið. Lögin voru líka öll samin áður en Internetið var til og við erum á mjög skrýtnum stað að ætla að stöðva þetta.“
Sverrir Einar Eiríksson, eigandi Nýju Vínbúðarinnar, segir í samtali við DV að hann taki heilshugar undir þessi orð framkvæmdastjóra Hagkaupa, að lögin byggi á úreltum grunni. Sverrir Einar segist aðspurður ekki hafa haft neitt veður af yfirvofandi ákærum vegna netsölu áfengis. Tekið skal fram að hvorki Hagkaup né Nýja Vínbúðin eru á meðal þeirra aðila sem ÁTVR kærði um árið, enda hafði hvorugur aðilinn hafið netsölu áfengis á þeim tíma. Ekki liggur fyrir hvort rannsókn lögreglu tekur eingöngu til hina kærðu söluaðila eða hvort aðrir koma þar við sögu.
„Ég hef ekki fengið neinar tilkynningar eða upplýsingar um að ákæra sé yfirvofandi í mínu máli og hef því engar áhyggjur af því. Við byrjuðum okkar starfsemi síðar en þeir sem nú eru til rannsóknar. Ég tek hins vegar heilshugar undir sjónarmið forstjóra Hagkaupa um að núverandi löggjöf er úrelt og endurspeglar ekki þann raunveruleika sem internetviðskipti búa við í dag,“ segir Sverrir Einar.
Rannsókn lögreglu hófst í kjölfar kæru ÁTVR á hendur þremur aðilum fyrir netsölu áfengis. Það var fyrir fimm árum og rannsóknin hefur staðið yfir síðan. Í lok maí árið 2024 sendi Ríkissaksóknari lögreglunni bréf þar sem krafist var skýringa á hægum framgangi málsins. Var lagt fyrir lögreglustjóra að gera grein fyrir stöðu kærumálanna og setja fram áætlun um meðferð þeirra. Ríkissaksóknari krafðist svara innan vikutíma, sem er óvenjulegt.
Lögregla svaraði bréfi Ríkissaksóknara fimm dögum of seint og baðst afsökunar á töfinni. Jafnframt er greint frá því í þessu svari, sem dagsett er 10. júní 2024, að rannsókninni sé við það að ljúka en beðið sé greinargerða frá annars vegar tolllgæslusviði Skattsins og hins vegar rannsóknarsviði Skattsins. Segir að þær greinargerðir muni berast rannsóknardeilidnni á næstu dögum (þ.e. um miðjan júní síðastliðinn).
Heilt ár er liðið frá þessum vendingum en nú berast fréttir af því ákærur séu yfirvofandi.
Fréttinni hefur verið breytt á þann veg að bætt var við ummælum eiganda Nýju Vínbúðarinnar.
