Málið hófst þann 23. maí síðastliðinn þegar dóttirin, sem er á barnsaldri, greindi frá því í skólanum að faðir hennar meiddi hana stundum á kynfærasvæðinu og stingi einhverju inn í kynfæri hennar.
Maðurinn var handtekinn sama dag og lagði lögregla hald á síma hans og tölvu í kjölfarið. Lögreglan fór fram á að fá aðgang að tækjunum með þeim rökum að mikilvæg gögn gætu fundist sem hefðu þýðingu fyrir rannsókn málsins. Héraðsdómur féllst á kröfuna þann 14. ágúst síðastliðinn.
Maðurinn kærði úrskurðinn til Landsréttar sem tók málið fyrir og féll úrskurður í gær. Í honum segir að lögregla hafi ekki sýnt fram á hvernig síminn og tölvan tengist hinu ætlaða broti né hvaða upplýsingar gætu legið þar sem hefðu verulega þýðingu fyrir rannsóknina.
Maðurinn heimilaði ekki aðgang að rafrænu innihalda tölvunnar og símans, meðal annars á þeim forsendum að þar kynnu að vera viðkvæm gögn sem tengjast tilteknum stjórnmálaflokki.
Í úrskurði Landsréttar kemur fram að bæði faðirinn og móðir stúlkunnar hafi sagt í skýrslutökum hjá lögreglu að vegna útferðar hefðu þau þrifið og þurrkað kynfærasvæði stúlkunnar með blautþurrkum og hún ekki verið sátt við það.
Í gögnum málsins kemur fram að stúlkan hafi ekki lýst broti af hálfu föður síns í skýrslu í Barnahúsi og ekkert óeðlilegt hafi fundist við læknisskoðun. Lögreglan hafi þó talið nauðsynlegt að kanna hvort tækin innihéldu efni sem tengdist rannsókninni, meðal annars hvort þar kynni að leynast barnaníðsefni, en í úrskurði Landsréttar er bent á að ekkert slíkt sé til rannsóknar í málinu.
Að þessu virtu taldi Landsréttur ekki fullnægjandi forsendur til að heimila rannsókn á tækjunum og var úrskurður héraðsdóms því felldur úr gildi.
