Hún deildi frásögn sinni í íbúahóp Laugarneshverfis á Facebook í morgun þar sem hún sagði:
„Góðan daginn kæru nágrannar! Við fengum afar óvelkominn gest í nótt! Maðurinn minn vaknaði við stærðarinnar rottu sem var komin upp í rúm til okkar!!! Maðurinn minn vakti mig og bað mig um að halda ró minni og fara fram með börnin strax! Hann fór svo inn og kláraði málið.”
Sara segist ekki vita hvernig rottan komst inn eða hvenær. Kveðst hún hafa haft samband við borgina sem hafi ætlað að senda meindýraeyði á vettvang til að fjarlægja rottuna.
„Ég er í andlegu áfalli,” segir Sara í samtali við DV en bætir við að sambýlismaður hennar, John, sé rólegur yfir þessu og hafi brugðist við af yfirvegun. „Hann er ekki hræddur við svona,“ segir hún. Tókst honum að drepa rottuna með brettinu sem sést á meðfylgjandi mynd.
Færsla Söru hefur vakið talsverða athygli í hópnum og eru sumir fullir aðdáunar yfir því hversu róleg þau eru. „Jesús minn, ég væri nú ekki til frásagnar eftir svona reynslu,“ segir í einni athugasemd. Þá veltir einn því upp hvort rottan tengist framkvæmdum sem standa yfir skammt frá.
