Loni Willison var eftirsótt fyrirsæta fyrir rúmlega áratug og var gift Baywatch-stjörnunni Jeremy Jackson. Hún hefur verið heimilislaus um nokkurt skeið og er reglulega fjallað um harmsögu hennar í fjölmiðlum þegar nýjar myndir af henni fara í dreifingu.
Loni var mynduð ganga um Beverly Hills hverfið á sunnudaginn. Daily Mail greinir frá og birtir myndir. Það sem vakti athygli var að hún virtist vera með silfurlitað Rolex úr, en slík úr geta kostað margar milljónir.
Loni virtist lifa lúxuslífi fyrir ekki svo löngu síðan og það er því mörgum ráðgáta hvernig hún endaði á götunni í Los Angeles.
Fyrstu myndirnar af henni að gramsa í ruslatunnum fóru í dreifingu í apríl árið 2023 og vöktu mikla athygli. The Sun birti aðrar myndir nokkru síðar þar sem ástand hennar virtist hafa versnað. Það vantaði í hana nokkrar tennur og var hún rauð og bólgin á eyranu og í kringum augun.
Samkvæmt erlendum miðlum ánetjaðist Loni fíkniefnum eftir skilnaðinn við Jeremy, sem er einna best þekktur fyrir að hafa leikið Hoby Buchannon í Baywatch-þáttunum sálugu á árunum 1991 til 1999. Hoby var sonur Mitch Buchannon í þáttunum sem David Hasselhoff lék.
Loni, 42 ára, var vinsæl fitness-fyrirsæta á sínum tíma og prýddi reglulega forsíður tímarita.
Loni og Jeremy gengu í það heilaga árið 2012. Þau litu út fyrir að vera hið fullkomna stjörnupar en það var fjarri sannleikanum.
Jeremy var ungur þegar hann ánetjaðist fíkniefnum. Hann var handtekinn fyrir amfetamínframleiðslu þegar hann var nítján ára og hefur farið fimm sinnum í meðferð.
Hjónabandið var stormasamt og var lögreglan kölluð á heimili þeirra í ágúst 2014 eftir að Jeremy hafði lagt hendur á Loni.
Hún sagði hann hafa kyrkt hana og lamið hana. Hún var með tvö brotin rifbein, hálsmeiðsli og klórför á andliti og líkama eftir árásina en ákvað að kæra ekki. Hún sagði frá því nokkrum árum seinna að hún sæi eftir því að hafa ekki kært, en hún hafi verið mjög veik á þessum tíma. Loni og Jeremy skildu í kjölfarið en því miður lauk martröð hennar ekki þar.
Ex-model Loni Willison seen dumpster-diving in LA https://t.co/eVE4hCUuAB pic.twitter.com/2Py8fY9CQs
— Page Six (@PageSix) June 28, 2023
Þegar þau skildu starfaði hún sem aðstoðarmaður lýtalæknis en skilnaðurinn var henni svo þungbær að hún gat ekki mætt til vinnu. „Það tók mig tvo mánuði að jafna mig. Ég þurfti að hætta í vinnunni, ég gat ekki stundað líkamsrækt eða tekið að mér fyrirsætuverkefni. Ég hitti ekki vini eða fór út úr húsi. Ég var á mjög slæmum stað,“ sagði hún árið 2015.
Hún fékk taugaáfall og glímdi við mikil andleg veikindi. Hún tæmdi bankareikningana sína og varð skuldug, árið 2016 missti hún íbúðina sína og þurfti að selja bílinn sinn. Hún endaði á götum Los Angeles og ánetjaðist kristölluðu metamfetamíni. Andlega heilsan tók enn frekari dýfu og hefur hún verið á götunni síðan þá.
Á meðan fyrrverandi eiginkona hans leitar að mat í ruslagámum hefur Jeremy einbeitt sér að líkamsrækt og kallar The Sun hann „fitnessgúrú.“ Aðspurður í gegnum árin hefur hann neitað að tjá sig um mál Loni og hefur sætt harðri gagnrýni fyrir að veita henni ekki hjálparhönd eftir skilnað þeirra 2014.
Sokaklarda yaşamaya başlayan model Loni Willison’ın yüzündeki morluklar endişelendirdi #Booncuk #Dedikodu #MagazinHaberleri https://t.co/smbuVYxRkT pic.twitter.com/MIsbXT3IfS
— Booncuk Hollywood (@BooncukH) September 1, 2023
Fyrir nokkrum árum sagði hún í viðtali við The Sun að hún hafði ekki farið í sturtu í heilt ár, af mjög sorglegri ástæðu. Hún sagði að hún reynir að vera eins skítug og illa lyktandi og hún getur svo hún verði ekki fyrir kynferðisofbeldi.
„Ég klippti hárið mitt líka, til að líta öðruvísi út. En það hefur verið ráðist á mig, það er það sem gerist á götunni.“
Margir héldu í vonina að Loni myndi fá aðstoð og þak yfir höfuðið eftir að mál hennar rataði í fjölmiðla en því miður er það ekki raunin.
