Maður smyglaði sér ofan í sundlaug án þess að greiða aðgangseyri og hagaði sér furðulega gagnvart öðrum gestum, segir í dagbók lögreglu. Var manninum gert að yfirgefa sundlaugina sem hann neitaði að gera og var því handtekinn og fluttur á lögreglustöð þar sem hann var látinn laus að skýrslutöku lokinni.
Einnig segir frá því að óskað var aðstoðar lögreglu vegna slagsmála í miðborginni og var maður handtekinn fyrir að hlýða ekki fyrirmælum lögreglu. Hann sá sig knúinn til að hóta lögreglumönnum lífláti og var hann fluttur á lögreglustöð og vistaður í fangaklefa.
Tilkynnt var um umferðarslys í Laugardal þar sem bíl hafði verið ekið í gegnum grindverk. Ekki eru frekari upplýsingar um málið.
Umferðarslys varð í póstnúmeri 104 þar sem þrír bílar skemmdust og einn reyndist óökufær. Ekki urðu slys á fólki og var bíllinn dreginn af vettvangi. Maður sem ók framhjá þessum slysavettvangi með síma á lofti til að taka myndskeið af því sem hafði gerst var kærður fyrir að nota farsíma undir stýri.
Maður var handtekinn í miðborginni grunaður um meiri háttar líkamsárás. Var hann fluttur á lögreglustöð og hótaði hann ítrekað að drepa lögreglumenn. Var hann vistaður í fangaklefa vegna málsins.
Tilkynnt var um að bensínsprengju hefði verið kastað í vegg sem var skemmdur eftir atvikið. Málið er í rannsókn, en ekki kemur fram í dagbókinni hvar þetta átti sér stað.
