Lögregla var kölluð til á Reykjavíkurflugvelli í gærkvöld þegar flugvél Icelandair frá Ísafirði lenti þar. RÚV greinir frá.
Segir að einn farþeganna um borð hafi sýnt af sér ógnandi hegðun og því hafi flugstjórinn ákveðið að kalla eftir aðstoð lögreglu. Forstöðumaður samskipta hjá Icelandair, Ásdís Ýr Pétursdóttir, staðfesti atvikið í samtali við RÚV. Segir hún að kveðið sé á um í verklagsreglum fyrirtækisins að óska eftir aðstoð lögreglu ef farþegi sýni af sér ógnandi hegðun.
Samkvæmt upplýsingum RÚV var hlið Reykjavíkurflugvallar opnað svo lögregla gæti keyrt beint upp að flugvélinni og handtekið farþegann þegar dyr flugvélarinnar voru opnaðar.
Flugvélin lenti á Reykjavíkurflugvelli laust fyrir kl. 19:30 í gærkvöld.
